Driefontein, Voor-Groenberg, Wellington
Die plaas Driefontein wat bestaan het uit 59 morg 400 vierkante roede is op 26 September 1704 aan Matthys Greeff toeken. Na verskeie eienaars kom die plaas op 16 Junie 1815 in besit van Pieter Gideon de Villiers. Hy verkry bykomende erfpaggrond en verdeel die plaas in drie dele. Die onderverdelings het daarna as Welbedacht en Philippusdal bekend gestaan. Hy het Driefontein en Welbedacht vir homself gehou en Philippusdal aan sy moeder gegee. Die restant van Driefontein het bestaan uit 24 morg 147 vierkante roede eiendomsgrond en 285 morg 443 vierkante roede erfpaggrond. Welbedacht het bestaan uit 35 morg 253 vierkante roede eiendomsgrond en 213 morg 227 vierkante roede erfpaggrond. Philippusdal het bestaan uit 200 morg 513 vierkante roede erfpaggrond. Na Pieter se dood in 1827 is Welbedacht op 11 Mei 1827 aan Andries Pieter Zeeman verkoop. Sien die deel oor Welbedacht vir die verdere geskiedenis van Welbedacht. Driefontein is op 11 Mei 1827 aan Gabriel Daniel Malan (1805-1893) verkoop. Gabriel verkoop Driefontein op 9 September 1849 aan Charl Jacobus Geldenhuys.